Кыргыз Республикасынын Тышкы иштер министринин орун басары Айбек Артыкбаев менен Сауд Араб Падышалыгынын Тышкы иштер министринин орун басары Валид Аль-Херейджинин онлайн жолугушуусу болуп өттү

2022-жылдын 17-январында саудия тараптын демилгеси боюнча Кыргыз Республикасынын Тышкы иштер министринин орун басары Айбек Артыкбаев менен Сауд Араб Падышалыгынын Тышкы иштер министринин орун басары Валид Аль-Херейджинин онлайн жолугушуусу болуп өттү.

Сүйлөшүүнүн жүрүшүндө тараптар кыргыз-сауд мамилелеринин актуалдуу маселелерин талкуулап, эки өлкөнүн ортосундагы саясий, соода-экономикалык жана маданий-гуманитардык кызматташтыкты мындан ары да чыңдоого багытталган натыйжалуу кадамдарды жасоону макулдашышты.

Тараптар бардык деңгээлдеги өз ара сапарларды, ТИМдер аралык саясий консультацияларды, ошондой эле эки тараптуу кызматташуу боюнча кыргыз-сауд Өкмөттөр аралык комиссиясынын кезектеги жыйынын уюштуруу зарылдыгын белгилешти.

Кыргызстан менен Сауд Арабиясынын ортосундагы дипломатиялык мамилелердин 30 жылдыгына байланыштуу тараптар 2022-жылы эки өлкөнүн Маданият күндөрүн, туризм жана бизнес форумдарды биргелешип өткөрүү боюнча макулдашышты.

Саудиялык тарап эки өлкөнүн БУУ жана ИКУ сыяктуу эл аралык уюмдардын алкагындагы тыгыз кызматташтыгын жогору баалады.

Бөлүшүү

Facebook LinkedIn Twitter VK OK