Кыргыз Республикасынын Тышкы иштер министри Р.Казакбаев менен Түркия Республикасынын Тышкы иштер министри М.Чавушоглунун ортосунда телефон аркылуу сүйлөшүү уюшутурулду

2021-жылы 1-майында түрк тарабынын демилгеси менен Кыргыз Республикасынын тышкы иштер министри Р.Казакбаев менен Түркия Республикасынын тышкы иштер министри М.Чавушоглунун ортосунда телефон аркылуу сүйлөшүү уюшутурулду.

Сүйлөшүүнүн башында М.Чавушоглу Кыргыз Республикасынын элине көңүл айтып, 2021-жылдын 28-29-апрелинде кыргыз-тажик чек арасында болгон окуяларда каза болгон жана жаракат алган жарандар тууралуу кабарды терең кайгыруу менен кабыл алгандыгын белгиледи. Ошол эле учурда, ал кырдаалды стабилдештирүү жана чыңалуунун андан ары курчушуна жол бербөө үчүн тараптардын көрүп жаткан чаралар боюнча жетишилген келишимдерди түрк тарабы колдоорунбилдирди.

Министр Р.Казакбаев маектешине жылуу сөздөрү үчүн ыраазычылыгын билдирип, 30-апрелде Кыргыз Республикасынын Президенти С.Жапаров Таджикстан Республикасынын Мамлекет башчысы Э.Рахмон менен жетишилген келишимдерге жана тышкы саясат ведомстволорунун башчыларынын сүйлөшүүлөрүнө ылайык кыргыз жана тажик тараптары согуш аракеттерин токтотуу жана чек ара аймактарынан аскерлерди жана аскердик техникаларды чыгарып кетүү жонүндө чечимге келгенин белгиледи. Көздөлгөн иш-чараларды жүзөгө ашыруу жана эки боордош элдин кызыкчылыгы үчүн мындан аркы жемиштүү сүйлөшүү процессин алып баруу жана тийиштүү турукташтыруучу шарттарды түзүү максатында эки өлкөнүн укук коргоо органдарынын жана аткаруу бийлик органдарынын кызматкерлеринин катышуусунда биргелешкен жумушчу топ түзүлгөндүгү жөнүндө маалымат берди. 

М.Чавушоглу жабыркагандарга медициналык жана гуманитардык жардам көрсөтүүдө түрк тараптын чечкиндүүлүгүн белгилеп, ошондой эле жабыр тарткан Кыргыз Республикасынын аймагын социалдык-экономикалык жана инфраструктуралык калыбына келтирүүдө Түркия Республикасынын ар тараптуу жардамга даяр экендигин билдирди.

Поделиться

Facebook LinkedIn Twitter VK OK