Министр Жээнбек Кулубаев Россия Федерациясынын Кыргыз Республикасындагы Элчиси Николай Удовиченкону дипломатиялык миссиясынын аякташына байланыштуу кабыл алды

2024-жылдын 11-июнунда Кыргыз Республикасынын Тышкы иштер министри Жээнбек Кулубаев Россия Федерациясынын Кыргыз Республикасындагы Атайын жана Ыйгарым укуктуу Элчиси Николай Удовиченкону дипломатиялык миссиясынын аякташына байланыштуу кабыл алды.

Сүйлөшүүлөрдүн жүрүшүндө Министр Элчини келе жаткан мамлекеттик майрамы – Россия күнү менен куттуктап, Кыргызстан менен Россиянын ортосундагы эки тараптуу мамилелерди өнүктүрүүгө жасаган иши жана жеке салымы үчүн ыраазычылык билдирди. Ал белгилегендей, Россиянын Атайын жана Ыйгарым укуктуу Элчиси болуп иштеген мезгилде эки мамлекеттин ортосундагы мамилелер стратегиялык өнөктөштүктүн жаңы деңгээлине көтөрүлгөн.

Тараптар жогорку деңгээлде жетишилген макулдашууларды ишке ашыруунун жүрүшүн, ошондой эле ушул жылы июль айында Красноярск шаарында боло турган Соода-экономикалык, илимий-техникалык жана гуманитардык кызматташтык боюнча кыргыз-россиялык өкмөттөр аралык комиссиясынын 25-жыйынына жана XI кыргыз-россиялык аймактар-аралык конференциясына даярдык көрүү маселелерин талкуулашты.

Элчи Н.Удовиченко кыргыз тарапка өз милдеттерин аткарууда көрсөткөн колдоосу үчүн ыраазычылык билдирип, Кыргызстан менен эки тараптуу кызматташууну мындан ары да тереңдетүү үчүн күч-аракетин жумшай турганын белгиледи.

Жолугушуунун соңунда Министр Жээнбек Кулубаев Элчи Николай Удовиченкону кыргыз-россиялык мамилелерин өнүктүрүүгө кошкон зор салымы үчүн Кыргыз Республикасынын Тышкы иштер министрлигинин юбилейлик медалы менен сыйлады.

Бөлүшүү

Facebook LinkedIn Twitter VK OK