Ушул жылдын 26-март күнү Кыргыз Республикасынын Тышкы иштер министрлигинин түзүлгөндүгүнүн 75-жылдыгына байланыштуу Кыргыз Республикасынын Тышкы иштер министрлигинин Ош, Жалал-Абад жана Баткен облустарындагы Ыйгарым укуктуу өкүлчүлүгү тарабынан Ош мамлекеттик университетинин Эл аралык мамилелер факультетинин студенттерине ачык лекция уюштурулду.

Лекциянын жүрүшүндө Өкүлчүлүктүн жетекчисинин орун басары Калдарали Маматалиев Кыргызстандын дипломатиялык кызматынын түзүлүш жана өнүгүү тарыхы, Кыргыз Республикасынын Тышкы иштер министрлигинин жана Өкүлчүлүктүн ишмердүүлүгү, ошондой эле мамлекеттин тышкы саясатынын приоритеттүү багыттары жөнүндө айтып берди.

Лекциянын алкагында студенттер азыркы дипломаттардын негизги сапаттары, бош орундарды толуктоо максатында министрлик тарабынан уюштурулуучу сынактар, ошондой эле министрликтин түзүмдүк бөлүмдөрүндө практика өтүү мүмкүнчүлүктөрү тууралуу суроолорун беришти.

Лекцияда Өкүлчүлүктүн кызматкерлери, профессордук-окутуучу курам, ошондой эле факультеттин студенттери катышышты.

Студенттер кызыгуу менен лекцияга катышып, кызыктырган суроолоруна жооп ала алышты.