2023-жылдын 13-мартынан тартып Кыргыз Республикасынын Новосибирск шаарындагы Башкы консулдугу мекендеш статусун (Мекен-карт) алуу үчүн документтерди кабыл алууда.

«Мекен-карт» алуу үчүн мурда Кыргызстандын жараны болгон чет өлкөлүк жарандар, алардын балдары жана неберелери кайрыла алышат.

 

«Мекен-карттын» үлгүсү

Чет өлкөлүк жарандыгы бар мекендештин макамы чет мамлекеттердин жарандарына (Кыргызстан менен чектеш мамлекеттердин жарандарынан тышкары) төмөнкү укуктарды берүү менен ыйгарылат: КР аймагына визасыз кирүүгө, чыгууга, транзиттик өтүүгө, көчүүгө жана жашап турууга; Кыргызстанда жашап турууга уруксат албастан туруктуу жашоого; эмгек визасын жана иштөөгө уруксат албастан Кыргызстан жарандары үчүн белгиленген негиздер жана тартипте иштөөгө же ишкердик менен алектенүүгө; жүргөн жери боюнча жөнөкөйлөтүлгөн түрдө каттоо мүмкүнчүлүгү (Кыргызстандын мамлекеттик чек арасын кесип өткөн учурдан тартып 90 (токсон) жумушчу күндүн ичинде); Кыргызстандын жарандары менен бирдей акы төлөө шарттарында медициналык жана билим берүү кызматтарын алууга; жер үлүшүнө жана/же участогуна укук пайда болгон учурдан тартып (эгерде  мураскор болсо) аны Кыргызстандын жаранына ээликтен ажыратканга чейин 10 жыл бою пайдаланууга.

«Мекен-карт» чыгарылган күндөн тартып 10 жыл мөөнөткө берилет.

Мамлекеттик төлөм (пошлина) 10 618 сомду түзүп, ал «Мекен-картты» өндүрүүчүлөр болгон Кыргыз Республикасынын Санариптик өнүктүрүү министрлигинин жана «Инфоком» МПБнын эсебине түшөт.

Мындан тышкары, Башкы консулдукта документтерди кабыл алуу үчүн консулдук жыйым (сбор) – 40 АКШ доллары өзүнчө төлөнөт.

Чет өлкөлүк жарандыгы бар «Мекен-карт» алуу үчүн керектүү документтердин тизмеси:

- чет өлкөлүк жарандын паспорту;

- чет өлкөлүк жарандын ал жараны болуп саналган мамлекеттин аймагында соттолбогондугу жөнүндө маалымкат;

- «Мекен картын» каттоо, даярдоо жана чыгаруу үчүн төлөмдү тастыктаган квитанция;

-    консулдук жыйымдар (сбор) төлөнгөндүгү жөнүндө квитанция

- туугандык байланышты ырастоочу документтер жана алардын көчүрмөлөрү (туулгандыгы тууралуу күбөлүк, туулгандыгы тууралуу күбөлүктөн көчүрмө, жеке маалыматтар өзгөргөн учурда - жеке маалыматтар өзгөргөндүгүн ырастоочу документтер).