2024-жылдын 4-апрелинде Самсун шаарына болгон жумушчу сапарынын алкагында Кыргыз Республикасынын Түркия Республикасындагы Атайын жана Ыйгарым укуктуу Элчиси Руслан Казакбаев Самсун шаарында жашаган Кыргыз Республикасынын жарандары менен жолугушуу өткөрдү.

Жолугушууда элчи Казакбаев жолугушуунун катышуучуларына Кыргыз Республикасынын жарандарынын укуктарын жана мыйзамдуу кызыкчылыктарын коргоо боюнча элчилик тарабынан жүргүзүлүп жаткан иштер, ошондой эле кыргыз-түрк эки тараптуу мамилелери тууралуу айтып берди. Элчи Түркия Республикасынын тиешелүү мамлекеттик органдарынын жетекчилиги менен өлкөдөгү кыргызстандыктардын жашоо шарттарын жакшыртууга жана зарыл колдоо көрсөтүүгө багытталган жолугушуулары тууралуу өзүнчө маалымат берди.

Иш-чаранын жүрүшүндө пикир алмашуу болуп, жарандар актуалдуу маселелерди талкуулап, кызыккан суроолоруна жооп алууга мүмкүнчүлүк алышты.

Элчи Руслан Казакбаев чогулгандардын баарын ыйык Рамазан айы, ошондой эле келе жаткан Орозо айт майрамы менен куттуктап, бакубатчылык каалады.

Жолугушуу мусулмандар үчүн ыйык айда байланыш жана тилектештиктин символу болгон «Оз ачаар» сый тамак менен аяктады.