2024-жылдын 18-19-апрелинде Кайсери шаарына болгон жумушчу сапарынын алкагында Кыргыз Республикасынын Түркия Республикасындагы Атайын жана Ыйгарым укуктуу Элчиси Руслан Казакбаев Кайсери уюшкан өнөр жай аймагына барды.

Иш сапардын алкагында Элчи Р.Казакбаев Кайсери Уюшкан өнөр жай аймагынын жетекчиси Мехмет Ялчын менен жолугушту. Кайсери Уюшкан өнөр жай (УӨА) аймагы Түркиядагы эң ири өнөр жай зоналардын бири болуп саналат, зонанын ишмердүүлүгүнүн негизги багыттары эмерек, текстиль, металл буюмдарын жана электр буюмдарын өндүрүү болуп саналат.

Элчи Р.Казакбаев эки өлкөнүн бизнес-коомчулугунун ортосундагы байланышты чыңдоо маселесин көтөрүп, Кайсери УӨАнын жетекчиси М.Ялчинди жана өнөр жай аймагынын мүчөлөрүн Кыргызстандагы өндүрүшкө инвестиция салуу мүмкүнчүлүктөрүн изилдөө үчүн Кыргызстанга келүүгө жана бизнес-форум уюштурууга чакырды.

Элчи Р.Казакбаев ошондой эле Кыргызстан менен кызматташууга кызыкдар бир катар ишканалардын ишмердүүлүгү менен таанышты, анын ичинде "Альфапен", "Пынарсан" ж.б.

Компаниялар менен болгон жолугушууда Кыргызстан менен соода жүгүртүүнү жогорулатуу маселелери талкууланды. Компаниялардын өкүлдөрү транспорттук чыгымдарды азайтуу үчүн Кыргызстанда өндүрүш ачуу жана продукцияны Евразия экономикалык биримдигинин рынокторуна экспорттоо маселесин кароого даяр экенин белгилешти.

Бул контекстте элчи Р.Казакбаев Кыргызстанга инвестиция тартуунун артыкчылыктарын, жүргүзүлүп жаткан реформаларды, салыктык преференцияларды, ири рынокторго жана приоритеттүү тармактарга чыгууну баса белгиледи.

Жолугушуунун соңунда тараптар кызматташууга жана тыгыз байланышты сактоого даяр экендиктерин билдиришти.