2023-жылдын 11-майында Кыргыз Республикасынын Дубай жана Түндүк Эмираттарындыгы Башкы консулдугу Кыргыз Республикасынын Конституциясынын кабыл алынгандыгынын 30 жылдыгына карата “Sharjah Cultural & Chess Club” администрациясы менен биргеликте шахмат сүйүүчүлөрү үчүн БАЭде эмгектенген мекендештер жана жергиликтүү тургундардын арасында биринчи турнирин уюштурду.

Турнирди Кыргыз Республикасынын Башкы консулу Тимур Абдижалил салтанаттуу ачып, андан улай БАЭде эмгектенген мекендештердин чыгармачыл тобунун катышуусунда төмөнкү улуттук композициялар аткарылды:

1. Машботой, комузчулар: Айназик Муктаровна жана Бегимай Есенжанова;

2. Манас жана Кара жорго, аткаруучу: Актилек Тургунбаев;

3. Кара жорго жана Кыргыз бий, аткаруучулар: Токтогул кызы Үмүтай жана Токтогул кызы Нурийла;

4. “Издейм сени” скрипка композициясы, аткаруучу: Бегай Сталбек кызы;

5. Кыргыз жана араб тилдеринде алып баруучулар: Шарджа Эмиратынын Аль-Касимия университетинин студенттери Тилек Усон уулу жана Рамазан Уланбек уулу.

Иш чарага “Sharjah Cultural & Chess Club” клубунун төрагасы, Араб шахмат федерациясынын президенти, Эл аралык шахмат федерациясынын вице-президенти - Шейх Сауд бин Абделазиз Аль Муалла, БАЭге таанымал акын-жазуучу жана изилдөөчү, Шарджа мурас институтунун жетекчиси доктор Абдельазиз Аль-Мусаллям жана БАЭ өкмөтүнүн өкүлдөрү, андан сырткары бир канча Эмираттык ишкерлер ошондой эле Эмиратта бизнес менен алектенген Мекендеш ишкерлерибиздин катышуусунда болуп өттү.

Жыйынтыгында Кыргыз Республикасынын Конституциясынын кабыл алынгандыгынын 30 жылдыгына арналган биринчи шахмат турнирине жалпысынан 63 оюнчу катышып, алардын арасынан кубокту БАЭде эмгектенген мекендешибиз Каримов Манас Байышбекович жеңип алды.