АКШнын бардык штаттарында жашаган кыргызстандык атуулдар 4-сентябрда Американын Иллинойс штатындагы Чикаго шаарына топтолушуп Кыргыз Республикасынын Эгемендүүлүгүнүн 30 жылдык маарекесин белгилешти. Аталган иш-чараларга Американын ар кайсы штаттарынан баардыгы болуп 3000ден ашык адам катышты. Ушул эле күнү кыргыздын улуттук жана башка спорттук оюндарынын он бир түрү боюнча мелдештердин ачылыш аземи болуп, анда Кыргызстандын АКШ жана Канададагы Толук Ыйгарым Укуктуу Элчиси Бакыт Аманбаев сөз сүйлөдү. Элчи чогулган элди Кыргызстандын Эгемендүүлүгүнүн 30 жылдык маарекеси жана спорттук оюндардын спартакиадасынын ачылышы менен Кыргыз Республикасынын президенти Садыр Нуркожоевич Жапаровдун атынан куттуктап, мекендештерди ынтымакка жана биримдикке чакырды. Өз сөзүндө Бакыт Аманбаев улуттук оюндардын кыргыз элинин улуттук кулк мүнөзүнүн калыптанышына, кыргыз маданиятынын сакталышына жана өсүп келе жаткан жаш муундарды кыргыз кылып тарбиялоодо мааниси чоң экендигин баса белгилеп, мелдешти ынтымак менен жогорку деңгээлде өткөрүүгө чакырды.

Спорттук оюндардын спартакиадасында кыргыздын байыркы улуттук оюндары ордо, тогуз коргоол, аркан тартыш жана башка дүйнөлүк спорттук оюндун түрлөрүнөн штаттар арасында мелдештер өткөрүлөт. Сапатакиаданын жыйытыктары бир күндөн кийин чыгарылат.

Ушул эле күндөрү Кыргыз Республикасынын АКШ жана Канададагы элчигинин кызматкерлери тарабынан жарандарга консулдук кызмат көрсөтүлүп, атуулдарды үстүбүздөгү жылдын 28-ноябрында өтүүчү парламенттик шайлоого карата шайлоочулардын тизмесинен текшерип, консулдук каттоодон өткөрүү иш-чаралары да аткарылды.