2021-жылдын 24-сентябрында Екатеринбург шаарындагы Кыргыз Республикасынын Башкы консулдугунун кызматкерлери, Россиянын ИИМ Свердлов облусундагы Башкы башкармалыгынын миграция суроолору боюнча кызматынын жана Россиянын ТИМ Екатеринбургдагы өкүлчүлүгүнүн жетекчилеринин жумушчу кеңешмесине катышышты. Иш-чарага дипломатиялык корпустун, Урал элдеринин үйүнүн (Дом народов Урала) жана аймактын диаспоралык уюмдардын өкүлдөрү чакырылган.

Жолугушууда тараптар Уралда жашап жана иштеп жүргѳн чет өлкөлүк жарандардын көйгөйлөрүн, ошондой эле миграциялык чөйрөдөгү абалды жакшыртууга багытталган биргелешкен иш-чаралардын башка аспектилерин талкуулашты.

Миграция суроолору боюнча башкармалыктын өкүлдөрү жолугушуунун катышуучуларын Россия Федерациясынын Президентинин жаңы коронавирус инфекциясынын (COVID-19) жайылышынын кесепеттерин жоюу мезгилинде Россия Федерациясындагы чет өлкөлүк жарандардын жана жарандыгы жок адамдардын укуктук абалын убактылуу жөнгө салуу чаралары жөнүндө Жарлыгына ылайык, 2021-жылдын 30-сентябрына чейин мекендештерин Россияда болуу абалын мыйзамдаштырууга чакыруу иш-чараларына активдүү көмөктөшүүгө чакырышты.