20-жылдын 2023-ноябрында Сеул шаарында Борбордук Азия өлкөлөрүнүн элчиликтеринин жана "Борбордук Азия-Корея Республикасы" кызматташтык форумунун Катчылыгынын көмөгү менен изилдөө институттарынын жана борборлорунун өкүлдөрүнүн катышуусу менен "Борбордук Азия-Корея Республикасы"форматында тегерек стол болуп өттү.

Кыргызстандын делегациясын КР Президентине караштуу Улуттук стратегиялык изилдөөлөр институтунун директору Канатбек Азиз жетектеди. Ал өз сөзүндө Корея Республикасы экономикалык өнүгүүнүн референттик модели катары Кыргызстан үчүн абдан жагымдуу экенин билдирди. "Ханган дарыясындагы керемет" 30-жылдын ичинде агрардык өлкөдөн өнүккөн мамлекетке, илимий-технологиялык өнүгүүнүн лидерине айланганын билдирди. Өз кезегинде Кыргызстан кореялык өнөктөштөрдү фармацевтика, туризм, жашыл энергетика, сейрек кездешүүчү металлдарды экспорттоо, инвестиция жаатында өз ара аракеттенүү жана биргелешкен ири долбоорлорду ишке ашыруу мүмкүнчүлүктөрү кызыктырышы мүмкүн экендигин билдирди. Кыргызстанга экономикалык долбоорлордон тышкары билим берүү жаатындагы долбоорлор да кызыктуу, айрыкча, санариптик технологиялар, робототехника, энергетика, бизнести башкаруу чөйрөлөрүндө экенин белгиледи.

Мындан тышкары, бул иш-чарада Кыргыз Республикасынын Корея Республикасындагы Элчиси Аида Исмаилова сөз сүйлөдү. Ал өз сөзүндө Кыргызстан "Борбордук Азия – Корея Республикасы"кызматташтык форумунун алкагындагы иш-чараларга катышууга өзгөчө маани берерин баса белгиледи. Борбордук Азия өлкөлөрү менен Кореянын ортосундагы кызматташтыкты активдештирүү жаатында аталган тегерек столду өткөрүүнүн актуалдуулугун белгиледи.  Бул иш-чара Борбордук Азия өлкөлөрү менен Корея Республикасынын ортосундагы кызматташуунун жаңы багыттарын ар тараптуу издөө жана аларды иш жүзүндө ишке ашыруу үчүн көбүрөөк мүмкүнчүлүктөрдү берүү менен өз ара аракеттенүү форматын натыйжалуу улантууга кошумча дем берет деп ишеним билдирди. Ошондой эле Аида Исмаилова Корея Республикасы менен кызматташууну өнүктүрүү Кыргыз Республикасынын тышкы саясатынын артыкчылыктуу багыттарынын бири болуп саналаарын жана учурда эки тараптуу мамилелерди бекемдөө жана кеңейтүү боюнча активдүү иштер жүрүп жатканын белгиледи.

Тегерек столдун ишине Казакстан, Кыргызстан, Тажикстан жана Өзбекстандын стратегиялык изилдөөлөр институттарынын башчылары, ошондой эле борбордук азия өлкөлөрүнүн элчилери жана Корея ТИМинин дипломаттары катышты.

Иш-чаранын жыйынтыгы боюнча биргелешкен билдирүү кабыл алынып, анда БА-КР форматында аналитикалык борборлордун форумун туруктуу негизде өткөрүү боюнча мындан аркы кадамдар чагылдырылган.