.svg){kind=icon}
Өзбекстан Республикасынын Тышкы иштер министри А.Х.Камилов менен жолугушуусу жөнүндө
2020-жылдын 5-ноябрында, Ташкент шаарында Кыргыз Республикасынын Тышкы иштер министри Руслан Казакбаев Өзбекстан Республикасынын Тышкы иштер министри Абдулазиз Камилов менен жолугушту.
Сүйлөшүүнүн башында Р.Казакбаев Кыргыз Республикасынын Президентинин м.а. жана Премьер-министри Садыр Жапаровдун атынан анын кызматка дайындалышы менен куттуктаганы үчүн өзбек тарапка ыраазычылыгын билдирип, Өзбекстандын Премьер-министри Кыргыз Республикасынын Өкмөтүнүн жаңы башчысын биринчилерден болуп куттуктаганын баса белгиледи.
Сүйлөшүүнүн башында Р.Казакбаев Кыргыз Республикасынын Президентинин м.а. жана Премьер-министри Садыр Жапаровдун атынан анын кызматка дайындалышы менен куттуктаганы үчүн өзбек тарапка ыраазычылыгын билдирип, Өзбекстандын Премьер-министри Кыргыз Республикасынын Өкмөтүнүн жаңы башчысын биринчилерден болуп куттуктаганын баса белгиледи.
Ошондой эле, министр Р.Казакбаев Кыргызстандагы учурдагы ички саясий кырдаал жөнүндө маалымат берди. Ал кыргыз тарап өзүнүн бардык эл аралык милдеттенмелерин жана буга чейин кол коюлган эки тараптуу жана көп тараптуу эл аралык келишимдердин так аткарылышын толугу менен сактайт деп ишендирди. Пандемия учурунда көрсөткөн колдоосу үчүн өзбек тарапка ыраазычылык билдирди.
Өз кезегинде Өзбекстан Республикасынын Тышкы иштер министри А.Камилов өзбек тарап боордош өлкөдө болуп жаткан окуялардын жүрүшүн тыкыр байкап турганын жана Кыргызстан элинин биримдикке, тынчтыкка, көзкарандысыз өнүгүүгө жана гүлдөп өнүгүүгө умтулуусуна ар дайым колдоо көрсөтүүгө даяр экендигин баса белгиледи.
Тараптар кыргыз-өзбек стратегиялык өнөктөштүгүнүн учурдагы жогорку деңгээлин канааттануу менен белгилеп, соода-экономикалык, инвестициялык, суу-энергетикалык, транспорттук жана маданий-гуманитардык чөйрөлөрдө эки өлкөнүн ортосундагы жемиштүү кызматташуунун перспективаларын, COVID-19 пандемиясына каршы биргелешип күрөшүү маселелерин талкуулашты, ошондой эле эл аралык жана регионалдык кызматташтык боюнча өз ара пикир алмашышты. Тараптар талкууланган бардык маселелер боюнча позициялардын окшоштугун белгилешти.
Кыргыз-өзбек мамлекеттик чек араларын делимитациялоо жана демаркациялоо процессин аяктоо жана эки өлкөнүн өкмөттүк топторунун ишин жандандыруу маселелерине өзгөчө көңүл бурулду.
Бардык тармактар боюнча кызматташтыкты тереңдетүүгө өз ара кызыкчылыктар айтылды жана жакынкы аралыкта Кыргыз Республикасы менен Өзбекстан Республикасынын ортосундагы эки тараптуу кызматташтык боюнча биргелешкен өкмөттөр аралык комиссиянын, Кыргызстандын Өкмөтүнүн Ыйгарым укуктуу өкүлдөрүнүн жана Өзбекстандын чек ара аймактарынын акимдеринин Кеңешинин, ошондой эле Кыргыз Республикасынын Жогорку Кеңеши менен Өзбекстан Республикасынын Олий Мажлисинин ортосундагы кызматташтык боюнча парламенттер аралык комиссиянын отурумдарын жакынкы арада өткөрүү зарылдыгы белгиленди.
Министрлер мындан ары иш жүзүндө жүзөгө ашыруу боюнча чараларды кабыл алуу менен Кыргызстан менен Өзбекстандын ортосундагы эки тараптуу кызматташуунун кечиктирилгис милдеттерин чечүү боюнча Жумуш Планын даярдоо боюнча иш алып барууга макулдашышты.
Сүйлөшүүнүн аягында тараптар жакынкы аралыкта жакшы коңшулаштык жана стратегиялык өнөктөштүк духунда эң жогорку жана жогорку деңгээлде эки тараптуу жолугушууларды уюштурууну макулдашышты.
Жолугушуунун жыйынтыгында тараптар Тышкы иштер министрликтеринин башчыларынын Биргелешкен Билдирүүсүн кабыл алышты.
Бөлүшүү
