2022-жылдын 23-24-октябрында Кыргыз Республикасынын Мамлекеттик катчысы Сүйүнбек Касмамбетов Өзбекстандын Кыргыз улуттук маданий борборунун 30 жылдыгына арналган иш-чараларга катышуу үчүн Ташкент шаарында иш сапары менен болду.

Майрамдык иш-чара Өзбекстанда жашаган кыргыз диаспорасынын өкүлдөрүнүн катышуусу менен Улуу Ата Мекендик согуш жылдарында ар улуттан турган 15 баланы баш калкалаган Шахмед Шамахмудовдун эстелигине гүл коюу аземинен башталды.

Ошол эле күнү Кыргыз Республикасынын Мамлекеттик катчысы С. Касмамбетовдун Өзбекстан Республикасынын Вице-премьер-министри – Туризм жана маданий мурас министри Азиз Абдухакимов менен жолугушуусу болду. Жолугушууда С. Касмамбетов Кыргызстан менен Өзбекстандын ортосундагы салттуу достук жана ынак коңшулук мамилелерге негизделген кызматташтыктын деңгээлине зор канааттануусун билдирди. Туризм жана маданият тармагындагы жигердүү эки тараптуу байланыштарды белгилеп, маданий алакаларды өнүктүрүү жана чыгармачыл топтордун гастролдорун көбөйтүү үчүн өз ара шарттарды түзүүнү сунуштады.

Өз кезегинде А. Абдухакимов мындай иш-чараларга чет элдик делегациянын жогорку деңгээлде катышуусун камсыз кылганы шарт түзгөн бул мааракелик иш-чараларга жеке катышкандыгы үчүн ыраазычылык билдирип, тарыхый достук байланыштарга негизделген кыргыз-өзбек кызматташтыгы динамикалуу өнүгүп жатканын белгиледи.

Улуттар аралык достукту чыңдоо Өзбекстандын мамлекеттик саясатынын артыкчылыктуу багыты экенин баса белгилеп, А. Абдухакимов Кыргыз маданий борборунун түзүлгөндүгүнүн 30 жылдыгы менен куттуктады. Бул датага байланыштуу ал ошондой эле республикада Кыргыз маданий борборунун 6 филиалы жана окуу кыргыз тилинде жүргүзүлгөн 51 мектеп иштеп жатканын белгиледи.

Андан соң Кыргыз Республикасынын Мамлекеттик катчысы С. Касмамбетов Өзбекстан Республикасынын Министрлер Кабинетинин алдындагы улуттар аралык мамилелер жана достук байланыштар боюнча Комитетинин төрагасы Рустамбек Курбанов менен жолугушту. Жолугушуунун жүрүшүндө тараптар Кыргызстан менен Өзбекстанда улуттар аралык достукту чыңдоо боюнча жүргүзүлүп жаткан иштер, Кыргызстан элинин Ассамблеясынын жана Комитеттин ишмердүүлүгү боюнча пикир алмашышты, ошондой эле маданият жана илим тармагында кызматташууну кеңейтүү мүмкүнчүлүктөрүн талкуулашты.

Маданий борбордун 30 жылдыгын майрамдоо Жаштар ордосунда «Жаңы Өзбекстан – жаңы мүмкүнчүлүктөрдүн өлкөсү» деген ураандын алдында түрдүү улуттардын өкүлдөрүнүн көркөм жана декоративдик өнөрүнүн көргөзмөсүн өткөрүүнү да камтыды. Көргөзмөнүн катышуучулары ар кандай улуттук маданий борборлордун бай улуттук маданияты, үрп-адаттары менен тааныша алышышты.

Көргөзмөдөн кийин Жаштар ордосунун чоң залында Өзбекстандын Кыргыз улуттук маданий борборунун түзүлгөндүгүнүн 30 жылдыгына карата гала-концерт уюштурулуп, анын жүрүшүндө Мамлекеттик катчысы С.Касмамбетов Өзбекстандын Кыргыз маданий борборунун төрагасы Р. Джаббаровду «Кыргыз Республикасынын маданиятынын отличниги» медалы менен сыйлады.

Майрамдык иш-чаралар 2022-жылдын 24-октябрында илимий коомчулуктун катышуусу менен «Өзбекстандык кыргыздардын өлкөнүн өнүгүүсүндөгү ролу» аттуу эл аралык илимий-практикалык конференцияны өткөрүү менен аягына чыкты. Конференциянын максаты - улуттар аралык ынтымакты жана диний толеранттулуктуу камсыздоо маселелерин, ошондой эле кыргыз улутунун өкүлдөрүнүн республиканын коомдук-саясий турмушундагы ролун талкуулоо болду.

Конференциянын алкагында Кыргыз Республикасынын Мамлекеттик катчысы С. Касмамбетов, Кыргыз Республикасынын Өзбекстан Республикасындагы Атайын жана Ыйгарым укуктуу Элчиси Муса Джаманбаев, Өзбекстандын Министрлер Кабинетинин алдындагы улуттар аралык мамилелер жана достук байланыштар боюнча комитеттин төрагасы Рустам Курбанов куттуктоо сөз сүйлөштү.

Сөзүнүн алкагында Элчи М.Джаманбаев Кыргыз улуттук маданий борборунун активисттерине Кыргыз Республикасынын Жогорку Кеңешинин Төрагасы Н.Шакиевдин атынан ыраазычылык каттарды тапшырды.