Кыргыз Республикасы менен Өзбекстан  Республикасынын ортосундагы чек ара аймактык кызматташууну андан ары активдештирүү максатында, 2019 – жылдын 7 – августунда Фергана шаарында өтүп жаткан «Fergana International Investment Forum 2019» Эл аралык инвестициялык форумуна 54 адамдан турган курамдагы Кыргыз Республикасынын Ош, Баткен жана Жалал-Абад областтарынын делегацияларынын өкүлдөрү менен бирдикте Кыргыз Республикасынын Өзбекстан Республикасындагы Атайын жана Ыйгарым укуктуу Элчиси Ибрагим Джунусов катышты.

Делегацияларды Ош областынан – Кыргыз Республикасынын Өкмөтүнүн Ош облусундагы ыйгарым укуктуу өкүлүнүн биринчи орун басары Б.Юсупов, Баткен областынан - Кыргыз Республикасынын Өкмөтүнүн Баткен облусундагы ыйгарым укуктуу өкүлүнүн биринчи орун басары Ж.Исакулов жана Жалал-Абад областынан - Кыргыз Республикасынын Өкмөтүнүн Жалал-Абад облусундагы ыйгарым укуктуу өкүлүнүн аппаратынын жетекчиси И.Масабиров жетектеп келишти.

Ошондой эле, кыргыз делегациянын курамында Кыргыз Республикасынын бизнес чөйрөсүнүн өкүлдөрү бар, алар иш чаранын алкагында өнөктөштөрү менен экспорттук-импорттук операцияларды жүргүзүү, биргелешкен ишканаларды түзүү жана эки мамлекеттин чек ара аймагында жайгашкан областтарынын экономикасына инвестициялоо маселелерин активдүү талкуулап жатышат.