2021-жылдын 17-мартында Тегеран шаарындагы Экономикалык Кызматташтык Уюмунун (ЭКУ) Маданият Институтунда, Ирандын Жаңы 1400-жылынын башталышына, жаңы кылымга жана Нооруз жаз майрамына арналган фестиваль болуп өттү.
     Иш-чарага, Иран Ислам Республикасынын Мажилисинин (Парламентинин)  мурунку спикери, Саади Адабий фондунун, фарс тили жана адабият  академиясынын президенти, академик Голям-Али Хадад-Адел, ЭКУнун маданият Институтунун директору Сарвар Бахти, Экономикалык Кызматташтык Уюмунун (ЭКО) мүчө өлкөлөрүнүн Ирандагы элчилери, ошондой эле Иран илиминин жана маданиятынын бир катар алдыңкы өкүлдөрү катышышты. Нооруз фестивалына Кыргызстандын атынан Кыргыз Республикасынын Иран Ислам Республикасындагы Элчиси Авазбек Абдуразаков  катышты.
     Нооруз фестивалынын майрамдык көргөзмөсүндө Кыргыз Республикасынын Тегерандагы  Элчилигинин аракети менен  кыргыздын колдонмо көркөм кол өнөрчүлүгүнүн буюмдары, кыргыздын улуттук кийимдери, ошондой эле кыргыздын улуттук тамактары менен таттуулары көргөзүлдү.
      Ошондой эле, Нооруз фестивалынын коноктору үчүн Кыргызстандын маданияты, элдик каада-салттары жана туристтик мүмкүнчүлүктөр  тууралуу тасмалар көрсөтүлдү.