Кыргыз Республикасынын Россия Федерациясындагы Элчилиги 2021-жылдын 29-декабрынан баштап Россия Федерациясына визасыз тартипте иштөө үчүн келген чет элдик жарандар, анын ичинде Кыргызстандын жарандары Россия Федерациясына кирген күндөн тартып 30 күндүн ичинде медициналык текшерүүдөн, ошондой эле манжа изин мамлекеттик каттоо жана сүрөткө тартуу тартибинен өтүшү керектигин дагы бир жолу маалымдайт.

Медициналык текшерүүгө - баңги каражаттарын же психотроптук заттарды врачтын рецептисиз колдонуу фактысынын бар же жок экендигин текшерүүнү, жугуштуу ооруларды, анын ичинде адамдын иммундук жетишсиздигинин вирусу (ВИЧ инфекциясы) менен шартталган ооруларды аныктоо кирет.

Аны тапшыруу үчүн чет элдик адам өздүгүн тастыктаган документти, миграциялык картаны жана анын көчүрмөсүн (бар болсо) көрсөтүшү керек.

Медициналык текшерүүгө - химиялык-токсикологиялык изилдөө, кан жана заара изилдөө, рентгендик изилдөө же компьютердик томография, какырыкты же башка материалды изилдөө, COVID-19га лабораториялык изилдөө, мурундун былжыр челин бактериоскопиялык изилдөө, ошондой эле дарыгерлердин (фтизиатр, дерматовенеролог, инфекционист, терапевт, психиатр-нарколог) текшерүүсү кирет.

Эгерде натыйжа терс болсо, тиешелүү күбөлүк берилет. Эгерде изилдөөнүн натыйжасы оң болсо же изилдөө жүргүзүлбөсө, күбөлүк берилбейт. Мындай жарандарга карата баңги каражаттарын же психотроптук каражаттарды же жогоруда көрсөтүлгөн ооруларды колдонуу фактысы аныкталган учурда, алардын Россия Федерациясында болушунун (жашоосунун) жагымсыздыгы жөнүндө же Россия Федерациясына кирүүгө уруксат бербөө жөнүндө чечим кабыл алынат.

Медициналык текшерүүдөн өтүүгө боло турган медициналык мекемелер Россия Федерациясынын жергиликтүү өз алдынча башкаруу органдары тарабынан аныкталат. Буга байланыштуу Элчилик Россиянын мамлекеттик жана жергиликтүү бийлик органдарынын веб-сайттарындагы тиешелүү маалыматтарга көз салып турууну өтүнөт.

Дактилоскопиялык мамлекеттик каттоо - манжа изин алуу жана сүрөткө тартуу жол-жобосун камтыйт. Ага өтүү үчүн чет өлкөлүк жарандар аймактык ички иштер башкармалыгына, же ведомстволук ишканага же ыйгарым укуктуу уюмга жеке кайрылуусу керек.

Жаныңызда паспорт, ошондой эле адамдын иммундук жетишсиздигинин вирусу (ВИЧ) менен шартталган оорунун жоктугу тууралуу маалымкат жана медициналык текшерүүдөн өткөндүгүн тастыктаган башка документтер болушу керек, б.а. медициналык текшерүү процедурасы манжа изин каттоодон өткөнгө чейин бүтүшү керек.

Милдеттүү мамлекеттик манжа изин каттоодон жана сүрөткө тартуудан өткөндөргө ырастоочу документ берилет. Бул жол-жобо бир жолку жана Россия Федерациясына кирүү/чыгуу санына карабастан акысыз.

Чет өлкөлүк жарандар милдеттүү мамлекеттик манжа изин каттоо, сүрөткө тартуу жана (же) медициналык текшерүүдөн өтүү боюнча милдеттерин аткарбаган учурда, Россия Федерациясында убактылуу болуу мөөнөтү кыскартылат.

Россия Федерациясына ишке орношуу менен байланышпаган максаттарда келген чет өлкөлүк жарандар Россия Федерациясына кирген күндөн тартып 90 календардык күндүн ичинде милдеттүү түрдө мамлекеттик манжа изин каттоодон жана сүрөткө тартуудан, ошондой эле медициналык текшерүүдөн өтүүгө тийиш.

Манжа изин милдеттүү мамлекеттик каттоонун жана сүрөткө тартуунун тартиби Россиянын Ички иштер министрлигинин аймактык органдарынын миграция маселелери боюнча бөлүмдөрүндө, ошондой эле Россия Федерациясынын Ички иштер министрлигинин «Паспорттук-визалык кызмат» федералдык мамлекеттик унитардык ишканасынын бөлүмдөрүнө караштуу ишканасында, ошондой эле Москва борборундагы Мамлекеттик бюджеттик мекеменин көп функционалдуу борборунда (Сахарово) ишке ашырылат.

Милдеттүү жол-жоболордон төмөнкү категориядагы адамдар бошотулат:

- алты жашка чейинкилер;

- мурда манжа изин каттоодон жана сүрөткө тартуудан өткөн адамдар да бул процедуралардан бошотулат.

Мындай чет өлкөлүк жарандар милдеттүү түрдө мамлекеттик манжа изинин каттоосунан жана сүрөткө тартуудан өткөндүгүн тастыктаган документ үчүн Россиянын Ички иштер министрлигинин иш жүзүндө жайгашкан жери боюнча аймактык органына кайрылууга укуктуу.

Эскертүү:

2021-жылдын 29-декабрына чейин Россия Федерациясынын аймагына кирген чет өлкөлүк жарандар үчүн манжа изин алуу процедурасынан өтүү зарылчылыгы кийин Россия Федерациясына жалпы тартипте киргенде келип чыгат. Бирок алар Россия Федерациясынан чыгуу жана андан кийин кирүү фактысын күтпөстөн, бул процедурадан алдын ала өтүүгө укуктуу.

Россия Федерациясынын Ички иштер министрлигинин миграция боюнча башкы башкармалыгынын маалыматы боюнча, чет элдик жарандар телефон аркылуу же жеке кайрылуусу менен Россиянын Ички иштер министрлигинин аймактык органдарынын миграциялык маселелер боюнча түзүмдүк бөлүмдөрүндө манжа изин тапшыруу жана сүрөткө түшүү үчүн алдын ала электрондук кезекке жазыла алат.

Россиянын Ички иштер министрлигинин Федералдык мамлекеттик унитардык ишканасына «Паспорттук-визалык кызмат» жана Москва шаарынын «Көп функционалдуу миграциялык борбор» мамлекеттик бюджеттик мекемесине караштуу ишканаларында кайрылуулар жандуу кезекте кабыл алынат.

 Милдеттүү мамлекеттик манжа изин каттоодон жана сүрөткө тартуудан өткөндүгүн тастыктаган документ жоголгон же бузулган учурда жогорудагы бөлүмдөрдүн бирине кайрылуу керек, ал жерде кайра документ берилет.