2022-жылдын 2-ноябрынан 5-ноябрына чейин Кыргызстандын жеңил өнөр жай тармагындагы ишкерлерине Италиянын Неаполь шаарына бизнес-миссия өткөрүлдү

 

Кыргыз Республикасынын Тышкы иштер министрлиги жана Кыргыз Республикасынын Италиядагы Элчилиги Кыргыз Республикасынын “Легпром” жеңил өнөр жай ишканаларынын ассоциациясынын, КРнын Мода жана текстиль ассоциациясынын көмөгү менен 2022-жылдын 2 - 5-ноябрь аралыгында Италиянын Неаполь шаарына жана Кампания аймагына бизнес-миссия уюштурулду.

Миссиянын максаты - италиялык бренддик компаниялар менен кызматташтыкты түзүү, тигүү жана текстиль өнөр жай тармагында өндүрүштүн мыкты тажрыйбаларын изилдөө.

Төрт күндүн ичинде атамекендик ишкерлер Италиянын алдыңкы компанияларынын өкүлдөрү менен жолугушту. КРнын өндүрүүчүлөрү италиялык “Loro Piana”, “Désireé”, “Kocca”, “Posillipo”, “Martissima”, “Nazareno Gabrielli”, “Borrelli” ж.б. сыяктуу өздүк бренди алдында чыгарылган эркек, аялдар кийими жана аксессуарлары өндүрүү боюнча тажрыйба менен таанышты, бир катар италиялык фабрикалар жана ательелер менен таанышышты, рынокту изилдөө, пландоо (проектирование) жана дизайн маселелерин, ошондой эле Кыргыз Республикасынын аймагында мүмкүн болгон өз ара кызматташтыктын жана биргелешкен долбоорлорду ишке ашыруунун перспективаларын талкуулашты.

Мындан тышкары, кыргыз делегациясы Европадагы эң ири “CIS di Nola” Коммерциялык бөлүштүрүү борборуна барып, анын жүрүшүндө италиялык бизнестин өкүлдөрү үчүн Кыргыз Республикасынын жеңил өнөр жай тармагында берилген шарттар, преференциялар, мүмкүнчүлүктөр, ошондой эле өндүрүштүк жана экспорттук потенциалы тууралуу презентация өткөрүлдү.

Соода-экономикалык байланыштарды жөнгө салуу максатында Неаполь ш. мэринин кеңешчиси К.Марчиани, Италиянын Экономика жана финансы министрлигинин алдындагы Экспорттук-кредиттик агенттиктин (САЧЕ) өкүлдөрү менен бир катар жолугушуулар, ошондой эле Кыргыз Республикасынын Италиядагы Элчиси Т.Базарбаевдин Беневенто ш. Мэри К.Мастелла жана Соода-өнөр жай палатасынын Президенти А.Кампезе менен жолугушуулары өткөрүлдү.

Сапардын жыйынтыгы боюнча атамекендик өндүрүүчүлөр италиялык компаниялардын жеңил өнөр жай тармагындагы алдыңкы тажрыйбалары менен таанышып, аларды кызыктырган суроолоруна жооп ала алышты. Муну менен бирге, италиялык компаниялардын өкүлдөрү атамекендик тигүү ишканалары менен кызматташууга кызыкдарлыгын билдиришип, андан ары изилдөө үчүн коммерциялык сунуштарды жиберүүнү суранышты.

Иш сапардын жыйынтыгы боюнча тараптар 2022-жылдын декабрында италиялык компаниялардын өкүлдөрүнүн Кыргыз Республикасына рынокту изилдөө жана өндүрүштү андан ары жайгаштыруу үчүн зыяратын уюштуруу жөнүндө алдын ала макулдашууга жетишишти.