2021-жылдын 20-июнунда Кыргызстандын Россия Федерациясындагы Элчилигинин өкүлдөрү «Ыр кесе» чыгармачыл сынагына катышты.

Бул маданий иш-чара Москвадагы кыргыз диаспорасынын кыргыз маданий борборунун жетекчиси Гүлшайыр Мырзабекованын демилгеси менен кыргыздын салттуу музыкасын башка диаспоралык уюмдардын арасында өнүктүрүү жана жайылтуу максатында уюштурулган.

Сынактын катышуучулары кыргыз элинин каада-салттарын,  элдик ырларды жана бийлерди, улуттук музыкалык аспаптардын коштоосунда номерлерди тартуулашты.

Белгилей кетсек, «Ыр кесе» сынагына Кыргыз Республикасынын бардык аймактарынан келген чыгармачыл чөйрөлөрдүн өкүлдөрү, 2019-жылдан бери катышып келишет.

Элчилик Россия Федерациясындагы кыргыздардын маданий-гуманитардык мурасын жайылтуу жана Россия Федерациясындагы мекендештерибиздин башын бириктирүү максатында, диаспоралык уюмдар тарабынан маданий иш-чаралардын өткөрүлүшүнө чоң маани берет.