2019-жылдын 5-ноябрь күнү Кыргыз Республикасынын Өзбекстан Республикасындагы Элчилиги Өзбекстандын дүйнөлүк экономика жана дипломатия Университетинин көмөктөшүүсү менен Кыргыз Республикасынын көрүнүктүү мамлекеттик жана коомдук ишмери, Кыргыз Республикасынын Өзбекстан Республикасындагы биринчи Атайын жана Ыйгарым укуктуу Элчиси Батырали Сыдыковдун жаркын элесине арналган тегерек стол уюштурду. Тегерек стол Батыралы Сыдыков жана анын ишмердүүлүгү менен тааныш Кыргызстандын жана Өзбекстандын мамлекеттик жана коомдук ишмерлеринин катышуусунда өткөрүлдү.
Ошондой эле, тегерек столдун алкагында мамлекеттик ишмердин 80-жылдыгына жана Кыргыз Республикасынын Тышкы иштер министрлигинин түптөлүшүнүн 75-жылдыгына арналган фотокөргөзмө да уюштурулуп, Батыралы Сыдыковдун өмүрү жана ишмердиги тууралуу видеотасма көрсөтүлдү.
Тегерек столдун ачылышында саламдашуу сөздөрү менен Кыргызстандын Өзбекстандагы Атайын жана Ыйгарым укуктуу Элчиси Ибрагим Джунусов, Өзбекстандын дүйнөлүк экономика жана дипломатия Университетинин эл аралык байланыштар боюнча Проректору Саидмухтар Саидкасымов, Кыргызстандын коомдук ишмери, «Курманжан Датка» фондунун төрайымы Жылдызкан Жолдошева, Ош шаарынын мэриясынын социалдык өнүктүрүү бөлүмүнүн башчысы Салтанат Аманова, «Өзбекстан-Кыргызстан» достук коомунун аткаруучу жетекчиси Зухритдин Исамутдинов жана Өзбекстандын Улуттук Университетинин алдындагы «Чынгыз Айтматов» борборунун жетекчиси Ахмаджон Мелибоев чыгышты.
Тегерек столдун жүрүшүндө катышуучулар Батыралы Сыдыков жөнүндө өздөрүнүн эскерүүлөрү менен бөлүшүп, Кыргызстандын Өзбекстандагы Атайын жана Ыйгарым укуктуу Элчиси кызматындагы ишмердигин, ошондой эле кыргыз-өзбек мамилелеринин түптөлүшүндө жана чыңдоодо чоң ролун өзгөчө белгилешти.