2021-жылдын 23-сентябрында Кыргыз Республикасынын Украинадагы Атайын жана Ыйгарым укуктуу Элчиси Жусупбек Шарипов Украинанын Улуттук Эне жана баланы коргоо ооруканасынын башкы директору Владимир Жовнир тарабанын демилгеленип уюштурулган "Охмадет окуулары" аттуу эл аралык илимий -практикалык конференциясына катышты.

Конференциянын ачылышында В.Жовнир дүйнө жүзү боюнча 2700гө жакын врачтар оффлайнда да, онлайнда да катышкандыгын, оорукананын балдардын ооруларын дарылоодо киргизген инновациялары, ийгиликтүү трансплантациялоо операциялары жөнүндө жана башка чет өлкөлөрдүн «Охмадеттери» менен эл аралык кызматташуусу тууралуу баяндады.

Өз кезегинде Элчи Ж.Шарипов өз сөзүндө В.Жовнирдин Кыргызстан менен Украинанын дарыгерлеринин ортосундагы кызматташтыкты орнотууга кошкон салымын белгилеп, эки өлкөнүн дарыгерлеринин тажрыйба алмашуудагы ийгиликтүү кызматташтыгын айтып, мындан аркы жемиштүү кызматташуу болотургандыгына үмүт артарын билдирди. Ал, ошондой эле украиналык "Охмадеттин" өнүгүшүндө Терещенконун мурасы фондунун негиздөөчүсү, искусствонун колдоочусу, ишкер Мишель Терещенконун баа жеткис ролун баса белгиледи.

Иш -чарага Кыргыз Республикасынын Саламаттыкты сактоо министрлигинин алдындагы Эне жана баланы коргоо улуттук борборунун директору Гүлзат Маймерова жана балдар кардиологу Данияр Аматов да катышты. Иш -чаранын жүрүшүндө эки тараптуу кызматташтыкты тереңдетүү үчүн кыргыз-украин тараптарынын ортосунда кызматташуу жөнүндө Меморандумга кол коюлду.