2020-жылдын 29-декабрында Кыргыз Республикасынын Украинадагы Атайын жана Ыйгарым укуктуу Элчиси Жусупбек Шарипов Украинанын, Болгария Республикасынын жана Румыниянын аймагында жашап жаткан кыргыз жарандары менен “ZOOM” онлайн платформасы аркылуу жолугушуу өткөрдү.

Жолугушуунун учурунда Элчи Ж.Шарипов эки тараптуу мамилелерди өркүндөтүүдө жана кыргыз маданиятын жайылтуу максатында Элчилик тарабынан уюштурулган иш-чараларга көмөк көрсөткөн, COVID-19 пандемиянын убагында оор абалда калып кеткен жарандарга жана гуманитардык жардам көрсөтүү максатында акчалай каражат топтоп жардам беришкен активдүү жарандарды ыраазычылык каттар менен белгиледи.

Ошондой эле, Элчи Ж.Шарипов Элчиликтин ишмердүүлүгү жөнүндө айтып берип, 2021-жылы Кыргызстан Эгемендүүлүгүнүн 30-жылдыгын белгилей тургандыгын белгилеп, жарандарды юбилейлик мааракени майрамдоо максатында жасала турган ар түрдүү иш-чараларга активдүү катышууну чакырды.

Элчи Ж.Шарипов жарандарды 2021-жылдын 10-январында боло турган Президенттик шайлоого жана Референдумга катышууга чакырды.

Онлайн жолугушуунун соңунда Элчи Ж.Шарипов жарандардын суроолоруна жооп берди.