2021-жылдын 24-сентябрында Кыргыз Республикасынын Украинадагы Элчилигинин демилгеси менен Кыргыз Республикасынын Эгемендүүлүгүнүн 30 жылдыгына карата Украинанын Улуттук балдар үчүн китепканасы менен бирге "Кыргызстан чексиз уникалдуу" темасында жаш өспүрүмдөр арасында өткөрүлгөн бүткүл Украиналык сүрөт конкурсун жыйынтыктоо жана жеңүүчүлөрүн сыйлоо аземи болуп өттү.

Жалпысынан Украинанын бардык булуң-бурчунан 2000ден ашык катышуучу катышып, алардын ичинен 32 чыгарма тандалып, жаш курак боюнча эки категорияда сыйлыктардын ээлери аныкталды. Жеңүүчүлөр диплом жана баалуу белектер менен сыйланышты.

Китепкананын башкы директору Алла Гордиенко Кыргыз Республикасынын Эгемендүүлүгүнүн 30 жылдыгы менен куттуктап, Украинанын жаш муундарынын арасында Кыргыз Республикасын таанытуу жана кыргыз маданиятын жайылтуу боюнча Китепкана менен Элчиликтин активдүү кызматташтыгын белгиледи.

Кыргыз Республикасынын Украинадагы Атайын жана Ыйгарым укуктуу Элчиси Жусупбек Шарипов катышуучуларды Украинанын Эгемендүүлүгүнүн 30 жылдыгы менен куттуктады.

Элчи Ж.Шарипов Кыргыз Мамлекеттүүлүгүнүн калыптынышынын тарыхы жөнүндө баяндама жасап, Украинанын жаш муундарынын арасында кыргыз маданиятын жайылтууда жемиштүү кызматташкандыгы үчүн жана өткөрүлгөн иш-чара үчүн китепкананын жетекчилигине ыраазычылык билдирип, Элчилик өлкөлөр ортосундагы маданий кызматташтыкты өнүктүрүүгө багытталган биргелешкен иш-чараларды өткөрүүгө даяр экенине ишендирип, жетекчиликке, китепкананын кызматкерлерине ыраазычылык каттарды жана белектерди тапшырып, ошондой эле, жеңүүчүлөрдү куттуктап, аларга чың ден соолук, окуудагы ийгиликтерди, чыгармачылык таланттын өнүгүүсүн каалап, диплом жана белектерди тапшырды.

Иш–чарага 2018-жылы Ч.Айматовдун 90 жылдыгына арналган сүрөт конкурсуна катышып, Кыргызстанга жолдомолорду утуп алган, Анна Барамидзе жана Дарина Задорожная аттуу жеңүүчүлөр дагы катышып, куттуктоо сөздөрүн айтып, Кыргызстан тууралуу айтып беришти.

Иш-чаранын жүрүшүндө китепкананын кызматкерлери кыргыз элинин "Ынтымак" аттуу жомогун сахналаштырып, улуттук кыргыз кийимдеринин көрсөтмөсүн уюштуруп, ошондой эле, "Кыргызстандын адабий мозаикасы" виртуалдык көргөзмөсүн жана кыргыз жомокторун окуу боюнча Украинанын аймагынан 50гө жакын окуучу катышкан, онлайн-марафонду көрсөтүштү.

Иш-чарага "Кадет корпусу" жатак мектебинин окуучулары, мектеп окуучулары жана китепкананын жаш окурмандары катышты.

Иш -чара карантиндик чараларды жана адамдардын санына карата чектөөлөрдү сактоо менен өткөрүлдү.