2021-жылдын 22-июнунда, Улуу Ата Мекендик согуш учурунда Украинанын аймагында курман болгон кыргыз жоокерлеринин элесин түбөлүккө калтыруу ишин улантуу максатында, Элчилик Черкассы облусунун Дашуковка айылында уюштурулган иш-чарага катышты, ал жерде Уметбек Асылбековдун элесин эскеришти.

Лейтенант У.Асылбеков 1944-жылы 21-февралда согушта курман болуп, Черкассы облусунун Дашуковка айылындагы боордош көрүстөнүнө коюлган.

Кыргыз жоокери У.Асылбековдун жакын туугандарынын суранычы боюнча, Дашуковка айылынын жетекчилиги У.Асылбековдун ысымын ал жерге коюлган боордош көрүстөнүнө кошууга жардам көрсөткөн.

Иш-чаранын жүрүшүндө Элчилик кыргыз жоокерлеринин фашизмди жеңишке кошкон салымын белгилеп, Украинанын аймагында согуш учурунда курман болгондордун элесин түбөлүккө калтыруу иштери жөнүндө маалымат берди.

Элчи Ж.Шариповдун атынан жергиликтүү бийлик өкүлдөрүнө кыргыз жоокери У.Асылбековдун элесин түбөлүккө калтыруудагы көмөгү үчүн ыраазычылык билдирилип, Дашуковка айылынын китепканасына, Элчиликтин демилгеси менен украин тилине которулган, "Манас" эпосу, кыргыз эл жомоктору, жана Ч.Айтматовдун чыгармалары белекке берилди.

Салтанатка райондук администрациянын өкүлдөрү, Дашуковка айылдык кеңешинин башчысы А.Белоус, Кыргыз Республикасынан келген У.Асылбековдун туугандары жана айыл тургундары катышты.