2020-жылдын 26-28-августунда Кыргыз Республикасынын Украинадагы Элчилигинин демилгеси менен Кыргызстандын Була өсүмдүктөрүнүн Ассоциациясы Глухов шаарында өткөн «Инновации в коноплеводстве 2020» аттуу VI Эл аралык илимий-практикалык конференцияга катышты.

Конференциянын жүрүшүндө Улуттук Агрардык Илимдер Академиясынын Була өсүмдүктөр Институтунун алдыңкы изилдөөчүлөрү техникалык кара куурайдын үрөн өстүрүү, тетрагидроканнабинолдун курамы аз жаңы сортторду өстүрүү жана өсүмдүктүн ушул түрүн кайра иштетүү жаатындагы илимий жетишкендиктер жөнүндө айтып беришти. Украиналык адистер, ошондой эле, баңги затын камтыбаган техникалык кара куурайдын жаңы сортторун көрсөтүштү.

Конференциянын практикалык бөлүгүндө кыргыз делегациясынын мүчөлөрү үрөн өсүмдүктөрү, селекциялык иштелмелер, талаада өндүрүштүк кара куурайды өстүрүү жана жыйноо технологиялары менен таанышты. Ошондой эле, адистердин катышуусунда техникалык кендерден ар кандай материалдарды жана буюмдарды жасоо боюнча мастер-класстар көрсөтүлдү.

Конференциянын алкагында кыргызстандык ЖЧК Интертекс Групп компаниясы менен Украинанын Улуттук Агрардык Илимдер Академиясынын Була өсүмдүктөр институту кызматташтык жөнүндө Меморандумга кол коюшуп, Бишкек шаарында өндүрүштүк кара куурай үрөнүн өндүрүүнү өнүктүрүү борборун ачуу боюнча макулдашууга жетишишти.