2023-жылдын 5-апрелинде Кыргыз Республикасынын Малайзиядагы Элчилигинде ыйык Рамазан айына жана Кыргыз Республикасынын Конституциясынын 30 жылдыгына карата кыргыз диаспорасынын өкүлдөрү менен жолугушуу болуп өттү.

Кыргыз Республикасынын Малайзиядагы убактылуу ишенимдүү өкүлү Атай Наматбаев куттуктоо сөзүн сүйлөп, ал элчиликтин ишмердүүлүгү жана Кыргыз Республикасы менен Малайзиянын мындан аркы кызматташтыгынын пландары тууралуу кыскача айтып берди. Ал биргелешкен күч-аракет менен Малайзияда жашаган мекендештерибиздин ынтымагына салым кошууга, ошондой эле эки өлкөнүн достук байланышын чыңдоого ар тараптан көмөк көрсөтүүгө болот деген ишенимин билдирди. Мүмкүнчүлүктөн пайдаланып, А.Наматбаев мекендештерди Рамазан айы жана Кыргыз Республикасынын Конституциясынын кабыл алынгандыгынын 30 жылдыгы менен куттуктады.

Мындан тышкары, консулдук маселелер боюнча укуктук сабаттуулуктун жана маалымдуулуктун деңгээлин жогорулатуу максатында тиешелүү түшүндүрүү иштери, атап айтканда, Кыргыз Республикасынын жарандарынын укуктарын жана кызыкчылыктарын коргоо боюнча жүргүзүлдү.

Иш-чаранын жүрүшүндө «Кыргыз-Малайзия достук коомунун» жетекчиси жана түзүүнүн демилгечиси, элчилик аркылуу көп убакыттан бери ар кандай иш-чараларды өткөрүүгө чоң жардам көрсөткөн Айгүл Акималиева менен салтанаттуу коштошуу аземи болуп өттү. Аталган уюмдун жетекчилигине активист, Малайзия университеттеринин биринин жаш магистри Ренат Ильяс уулунун талапкерлиги көрсөтүлдү.

Ифтарга келгендердин баары чакырылып, анда мекендештер бири-бири менен таанышып, жагымдуу маек курушту.

Жолугушуу жылуу жана достук атмосферада өттү.